2Th 3 | NAS | STEP | Niiꞌmaikororiꞌ ee, asiꞌnanaare anaare: Diiꞌke kunsi-koo pakumereriai Ovoring bakaang kara iriꞌnarung beremparara kuung deempuriainaꞌ teeꞌpinaꞌ diiꞌkoo meuꞌke nkoaruꞌnaꞌ.

2 Thessalonians 3

Paulaꞌke Botovuruꞌnaꞌ Teing Mintoong-koo Kontevoromaing Daaꞌaariiꞌnaang

(3:1-18)

Paulaꞌke Niaꞌuruꞌnaꞌ Kunsievaariiꞌnaang Bakaning Pakupaku-nupoong Nariꞌ

1 Niiꞌmaikororiꞌ ee, asiꞌnanaare anaare: Diiꞌke kunsi-koo pakumereriai Ovoring bakaang kara iriꞌnarung beremparara kuung deempuriainaꞌ teeꞌpinaꞌ diiꞌkoo meuꞌke nkoaruꞌnaꞌ. 2 Eeꞌnoko napoꞌ kunsi-koo pakumereriai Kumponinge pakumuriainaꞌ teing nantoonge oravoonge tamaariꞌneeng. Aiꞌ ookarai tee masikaꞌantavaavaung. 3 Ovoringe tee diiꞌ siꞌduriaukaꞌnung, puring-antaruriaing eeꞌnoko ueeng-antaruriaing tee orara-koo. 4 Eeꞌnoko tee niiꞌke noruꞌdarampiri otong diiꞌke tampaꞌ nkoverimaung eeꞌnoko teeꞌ nariꞌ nkoverimatoaing teeꞌ nariꞌ naurarampiruꞌnaꞌ, diiꞌ Ovoring-koo kuung otorimaung-koo. 5 Ovoringe koonturiaing diikaang domang Kumponing bakaang piaa tasiꞌperira oroꞌantaveriainaꞌ eeꞌnoko Karistooꞌ bakaang pinkapinkaꞌ napoꞌ tasiꞌperima nariꞌ nkoveriiꞌnaang toroaravainaꞌmung nemperi.

Paulaꞌke Ookara Nantoong Tampaꞌ Mintoong-koo Botovuruꞌnaꞌ

6 Niiꞌmaikororiꞌ ee, enang niiꞌke naurarampimaang diiꞌ tee-koo Ovoring Jiisuuꞌ Karistooꞌ bakaang miring-koo kuunge: Tontaꞌdariri otoriai teing-eta niiꞌning diiꞌmaikororiꞌ kakapotonuka, kakeꞌiirariri mintoontariainaꞌ naurarampiruꞌnung-koo kantoꞌpariaing-eta. 7 Diiꞌke tee noruꞌeri otong niiꞌkoo biꞌantarariainaꞌ. Niiꞌ teing kakapotonuka deeaꞌ diiꞌ ninka oꞌnoritaaꞌ 8 Niiꞌ teing niiꞌnunge tamung bauꞌmuriarukoꞌning mooꞌdopai, teka niiꞌ aaꞌnaꞌ mintoomarikoꞌ doong eeꞌnoko muung niiꞌke diiꞌ mankiꞌantararampiarooꞌnaang. 9 Tee makosi diiꞌke niiꞌ tamung bauꞌkoo, nka niikaang mintoong niiꞌke nkoampikoꞌnung tee diiꞌke ooveri niiꞌkoo biꞌantarariiꞌnaang. 10 Tenang diiꞌ niiꞌ ninka nariꞌ oꞌnoritaaꞌ niiꞌke tee teeꞌ nariꞌ napoꞌ tautaurarampiruꞌ eeꞌpinaꞌ: Naning kakaruaꞌoaing tee taamang-koo doꞌdeꞌeriaukaꞌ. 11 Teeꞌ naurarampimaang taarararampira diiꞌkoo niiꞌning teing kakapotonuka tamung niiꞌning biikaning mintoong-koo papuraankaꞌantaverererimaing, diikaning mintoong nkosiiriaꞌ. 12 Enang tee temuriiꞌ nantoong niiꞌke botorarampima tautaurarampimaang Ovoring Jiisuuꞌ Karistooꞌkoo kuunge mintoontariiꞌnaang dooroontariri. Diikaang iriꞌketaꞌ taamaniriaing. 13 Diiꞌ niiꞌmaikororiꞌ iriꞌ oꞌdariaukaꞌ tee-koo nko-nko tampara-koo. 14 Naning tee kupiꞌoko taara-koo aung kara niiꞌke minkuampiring aneꞌ karavotonaneꞌkoo noruꞌerira tontaꞌdariaing tee-ankoita, eeꞌnoko maiaꞌoaing tee. 15 Karenung pinaꞌ noruꞌeriaukaꞌnung tee, teka tautaueriaing tee-pinaꞌ diiꞌmaikoꞌ.

Siꞌnooraꞌnaare

16 Enang tee Ovoring mooa okovenung eeꞌnarai mooa aruriaing uatepa ootukunung taung-koo. Tee diiꞌ ookara ninka otoriaing.

17 Enang tee, ninge Paulaꞌke napoꞌ tampara minkurampimang anaare ninge koontoꞌ daariama nkaang birenge miring taaꞌniꞌantamari. Tee taaꞌniꞌanta ookara karavotonaneꞌpi-koo taaꞌniꞌantamaramaung nkanaꞌ daarimaramanaꞌ.

18 Tee biraanke niikaang Ovoring Jiisuuꞌ Karistooꞌ bakaang diiꞌ ninka nariꞌ otomatoaing. Eeꞌ, teeꞌ nariꞌ.